//అడ్డుగోడలు//

//అడ్డుగోడలు//

------------------

భావరాజు పద్మిని - 22/816

వేయి కనుల వెన్నెలకి - వర్ణమేదొ వెతుకులాట

కోటి గుండెల హర్షానికి - కులమేదని కుమ్ములాట

పల్లవించు పయనానికి - తల్లివేరు తవ్వులాట

'సింధువైన' బిందువమ్మ - మేఘమేదో తెలపాలట !

రాకెట్టుల కాలంలో, ఓ మనిషీ నీ పయనం ఎటు?

విశ్వమంతా - దేశమంటూ, రాష్ట్రమంటూ, జిల్లా అంటూ,

మండలాలు, పట్టణాలు, పల్లెలుగా విభజించి...

కులాలని, మతాలని, ప్రాంతాలని, జాతులనీ,

తలవెంట్రుక చీలినట్టు చీలిపోవు తరుణాన...

మనిషేక్కడ మరుగాయెనో మరి,

మనిషిని మనిషిగ చూసే...

మనసెక్కడ మరుగాయెనో ?

నీకింతే గాలంటూ, నీకింతే నీరంటూ,

నీకింతే నేలంటూ, నీకింతే తిండంటూ,

కులానికో జగాన్ని, మనిషికింత ముక్కను

గిరిగీసుకునిచ్చాడా, భువిని మనకు విధాత ?

బారెడు దేహంలో, బండెడు మాంసానివి,

యెర్రని రక్తం పారే, సప్తధాతు సౌధానివి,

ఎక్కువేమి తక్కువేమి ఎన్నడూ లేదిక్కడ !

ఉన్నవెన్ని వన్నెలైన వెంటరావు నీతోన,

ప్రాణముంటె శివానివి, లేకపోతె శవానివి

కాలే కట్టెకు కులాలు ఎన్నద్దిన ఒకటేలే !

గూగులమ్మ వేట మాని, గుండెలోన వెతుక్కో !

ఒక్కగొంతు కేక జతగ మరిన్ని కూడి కేరింత,

ఒక్క అడుగు నడకైతె మరిన్ని కలిపి కొత్తబాట,

ఒంటిగొచ్చి ఒంటరిగా వెళ్ళిపోవు జీవితాన,

ఒంటరితనమును తీర్చే ఆసరాయె జనమంతా !

గీసుకున్న గిరులు నిన్ను కుంచించే తరుణాన,

కళ్ళు తెరవకుంటే, కడకు నిన్నూ విభాజిస్తారోయ్,

కట్లు తెంచుకోవోయ్, నీ కుటుంబమే ఈ జగమంతా!

మానవతే మన మతం, కలుపుగోలు మన కులం,

సేవ కొరకె జీవితం, సమతే మన సుగంధం,

మమత పంచుకుంటు పొతే మనుగడ ఇక మధువనే !

స్వార్ధమంటు వీడి చూడు స్వర్గముంది భువిలోనే !

అడ్డుగోడ కూల్చి చూడు అందరుంది నీలానే !

నిన్ను నువ్వు నెగ్గి చూడు అంతా ఇక నీలోనే !