సాగిపో నేస్తమా...

సాగిపో నేస్తమా...

-------------------

భావరాజు పద్మిని - 21/11/15

జలపాత ఉరవడి కావాలంటే,

బండరాళ్ళ రాపిడిని తట్టుకోవాలి.

చిన్నవిత్తైనా మొలకెత్తాలంటే

గట్టి తొడుగును ఛేదించాలి.

హరివిల్లు విరియాలంటే,

ఎండా-వానా ఢీ- కొనాలి.

సాగర గాంభీర్యం కావాలంటే,

బడబాగ్నిని లోనే దాచాలి.

తొలకరివై కురియాలంటే,

గుండెల్లో ఆర్ద్రత దాచుకోవాలి.

గడ్డిపువ్వైనా వికసించాలంటే,

ఋతువుల పరీక్షల్లో గెలవాలి.

బురదపానుపు లేనిదే,

పద్మం ఉనికి ఉంటుందా ?

ఎదురుదెబ్బలు తగలనిదే

కుదురైన నడక వస్తుందా ?

ఎడారి జాడలు లేకుంటే,

ఒయాసిస్సుకు విలువుందా ?

చీకటి పరదా లేనిదే,

వెన్నెల కానవస్తుందా ?

లోలోన తపన రగలనిదే

సూర్యుడైనా వెలగలేడు.

చెరిసగం చీకటి వెలుగులు

ఈ భూగోళానికే తప్పలేదు.

అందుకే...

అపహాస్యాలే ఆశీర్వాదాలుగా,

అవరోధాలనే సోపానాలుగా,

అడ్డంకులనే ఆహ్వానాలుగా,

అపజయాలనే ఆలంబనగా.

మార్చుకుని...

ప్రతిరోజూ కొత్తపాఠాలు నేర్చుకుని,

సాగిపో నేస్తమా !