స్పూర్తి

స్పూర్తి 

(పద్మిని భావరాజు , 21/6/2013)

-----------------------------------------

గలగల పారే సెలయేరు నీవు,

బండరాళ్ళు నీ గమనాన్ని ఆపలేవు.

తళతళ మెరిసే తారవు నీవు,

నీలిమబ్బులు నిన్ను దాచలేవు.

కిలకిల రావాల తీపి కోకిల నీవు,

కొమ్మమాటులు నీ గొంతు నొక్కలేవు.

జలజల రాలే తొలకరిజల్లువు నీవు,

సుడిగాలి తెర నిన్ను అడ్డుకోలేదు.

సలసల కాగే సూర్యుడు నీవు,

అరచేతిని అడ్డుపెట్టి నిరోధించలేరు.

నేస్తమా,

అసూయలు నీవు ఎదుగుతున్నవని సూచిస్తాయి,

అపనిందలు నిన్ను మరింత గట్టిపడేలా చేస్తాయి ,

అడ్డంకులు నిన్ను విజయానికి చేరువ చేస్తాయి.

మన సంకల్పబలమే మనకు అండ...

తీరానికి బలంగా డీ కొట్టితే ,

రెట్టింపు వేగంతో  లేస్తుంది కెరటం.

గోడకు బంతిని బలంగా విసిరితే, 

ఆ విసురుకే విసుగు పుట్టిస్తుంది బంతి.

బలమయిన సునామీ తర్వాతయినా,

ప్రశాంతంగానే ఉంటుంది ప్రకృతి.

ఇవన్నీ మనకు సహజ స్పూర్తి. 

లే, ఉదయభానుడి తొలి కిరణంలా,

శరత్కాలపు నిండు పున్నమిలా,

చిన్ని రెక్కల మిణుగురులా,

నీ మనసు దీపపు వెలుగులతో,

మళ్ళి లోకానికి నీ ప్రత్యూష కిరణాలు పంచు.